Romano's Macaroni Grill - Almost Review

مطعم مكاروني جريل .. مطعم ايطالي أمريكي المنشأ يقع في طرف الأفينيوز من جهة ايكيا .. طبعا المطعم ما عليه دوس وايد .. ممكن لان مكانه لم يخدمه ..أو لان الكويتيين اهل هبات فلم تحوشه تلك الموجة .. أو يمكن لانه مو ذاك الزود .. مو مهم السبب ولكن المهم هو الأكل والسعروالجو العام للمطعم .. المينيو غني وواضح بالاطباق مع بعض الصور المدعمه اللي تبين الاطباق (يعني ماراح يكون براشيم أو الغاز نفس بعض المطاعم) .. اسم الويترس أو الويتر عادة ينكتب على الطاوله بألوان شمعية .. وتكون هذه الالوان مسلية لك عزيزي الفنان التشكيلي لتمارس رسوماتك اللهوية اللي كنت ترسمها بالمرحلة الابتدائية …يقدم لك اول شي خبز ايطالي مع زيت الزيتون بالفلفل الاسود عشان تغمس على راحتك

الخبر الايطالي الحار

 ومن بعدها قررت أن اختار العرض الموجود لشخصين حيث يتيح لك الاختيار ما بين السلطة الخضراء أو السيزار و تختار طبقا من  المقبلات وطبقين رئيسيين من قائمة متاحة يتواجد فيها أغلب الأطباق الايطالية المعروفة .. جميع ما سبق بسعر عجيب هو 9.9 دينار 

سلطة السيزار

روبيان وخرشوف كمقبلات للتغميس .. لمن لا يعرف الخرشوف فهو نوع من أنواع الخضار المخرشف

 باستا الدجاج بصوص الفريدو 

 دجاج البارميزانا

  المطعم  بشكل عام ممتاز .. الأطباق كبيرة وتشبع عالأخر والطعم ايطالي ناطع .. الجو العام جميل في المطعم برحابته وقلة عدد رواده .. والسعر معقول جدا خصوصا مع الزيادات الكبيرة في بعض المطاعم مؤخرا والتي تقدم أقل مما يقدم هنا في مكاروني جريل .. فعلا المطعم يستحق التجربة لمن لم يجربه